Ózbekstan Respublikası Mektepke shekemgi hám mektep bilimlendiriw ministrligi qasındaǵı Mektepke shekemgi bilimlendiriw agentligi menen birgelikte “MercyCorps” tárepinen 2023-jıldıń 12- hám 21-iyul kúnleri Surxandárya wálayatı Termiz qalası hám Qaraqalpaqstan Respublikası Nókis qalasında “Mektepke shekemgi bilimlendiriw sapasın asırıw hám pedagoglardıń kásiplik rawajlanıwınıń áhmiyeti” atamasındaǵı ámeliy konferenciya bolıp ótti.
AQSh Awıl xojalıgı ministrligi tárepinen qarjılandırılǵan Ózbekstandaǵı “Mercy Corps”tıń Ózbekstanda balalardıń bilim alıwı hám awqatlanıwı ushın “Mak Govern-Doul” xalıqaralıq baǵdarlaması-Qaraqalpaqstan Respublikası hám Surxandárya wálayatındaǵı mámleketlik mektepke shekemgi bilimlendiriw shólkemlerinde bilimlendiriw sapasın jaqsılawǵa qaratılǵan. Bul baǵdarlama sheńberinde, Termiz hám Nókis qalalarında shólkemlestirilgen konferenciyada 171 pedagog hám metodistler, 22 mentor (tárbiyashı), sonıń menen birge, 60 mámleketlik mektepke shekemgi bilimlendiriw shólkemleri direktorları hám Mektepke shekemgi bilimlendiriw ministrligi wákilleri qatnastı. Bayanatshılar arasında American Councils shólkeminen English Speaking Nation (ESN) trenerleri Vendi Koulson hám Yuta Otake, balalarda erte sawatlılıqtı rawajlandırıw boyınsha óziniń xalıqaralıq tájiriybeleri menen bólisti.
Konferenciyada pedagoglar hám olardı qollap-quwatlaytugın mentorlar (tárbiyashılar) hám “Mercy Corps” tárepinen Ózbekstandaǵı mektepke shekemgi bilimlendiriw shólkemleri pedagoglardıń potencialın asırıw baǵdarlaması sheńberinde balalarda dáslepki jasınan sawatlılıǵın rawajlandırıw sheńberinde ótkerilip atırǵan ámeliy islerdiń jetiskenlikleri haqqında maǵlıwmat berip ótildi. Sonıń menen birge, mentorlıq (tárbiyashılıq) baǵdarlaması arqalı mektepke shekemgi bilimlendiriw shólkemleri pedagogların potencialın asırıw hám balalardıń dáslepki jasınan sawatlılıǵın rawajlandırıw ushın jámiyet hám shańaraqtı qollap-quwatlawdı kúsheytiw, mektepke shekemgi jastaǵı balalar salamatlıǵı hám gigiyenasın durıs jolǵa qoyıw boyınsha pikir almasıldı. Iláj juwmaǵında, konferenciya qatnasıwshılarına sertifikatlar tapsırıldı hám Qaraqalpaqstan Respublikası hámSurxandárya wálayatınıń Ózbekstandaǵı “Mercy Corps” baǵdarlamasına kiritilgen barlıq mámleketlik mekteke shekemgi bilimlendiriw shólkemleri ushın plakatlar, oqıwkartaları toplamları hám balalarda erte sawatlılıqtı rawajlandırıw boyınsha ámeliy ideyalarǵa iye pedagoglar ushın konferenciya qollanbasınan ibarat sıylıqlar toplamı tapsırıldı.
