Sud hákimiyatınıń tiykarǵı wazıypası – puqaralardıń huqıq hám erkinliklerin, olardıń nızamlı máplerin qorǵaw, nızamlardı hám basqa normativ-huqıqıy hújjatlerdi orınlaw hám qollanıwda nızamlılıqtı hámde ádalatlıqtı táminlewden ibarat. Bul «2022-2026» jıllarǵa mólsherlengen Jańa Ózbekstannıń taraqqiyot strategiyasınıń 15-maqsetinde hám óz sáwleleniwin tapqan. Usılardan kelip shıǵıp, Prezidentimizdiń “Operativ-izlew hámde tergew jumısında shaxstıń huqıq hám erkinliklerin isenimli qorǵaw kepilliklerin jánede kúsheytiriw is-ilajları haqqında”ǵı pármanı menen tergew sudyası lawazımın engiziw belgilendi. Hújjetke kóre, 2025 jıl 1 yanvardan jınayat isleri boyınsha rayon, qala sudlarına tergew sudyasi lawazımı kiritilip, olar sudqa shekem is júritiw dáwirinde processual qararlarǵa sankciya beriw hám májbúrlew sharaların qollanıw máselesin hámde hákimshilik huqıqbuzarlıqlar haqqındaǵı islerdi kórip shıǵadı. Ámelge asırılıp atırǵan reformalar is boyınsha barlıq jaǵdaylardıń sud tárepinen hár tárepleme tekserilip, dálillerge qalıs baha beriliwine, nátiyjede aqlaw húkimleriniń kóbeyiwine hám puqaralardıń sudqa bolǵan isenimin asırıwǵa xızmet qıladı. Jınayat isleri boyınsha Nókis rayonı sudı baslıǵı A.Seytanov
Sud hákimiyatınıń tiykarǵı wazıypaları
