«Ózbekstan-2030» strategiyası

Jańalanǵan konstituciyalıq-huqıqıy sharayatlarda mámleketimiz rawajlanıwınıń tiykarǵı baǵdarların jetilistiriw hám ámelge asırılıp atırǵan keń kólemli reformalardı jańa basqıshqa alıp shıǵıw maqsetinde 2023-jıldıń 11-sentyabr kúni Ózbekstan Respublikası Prezidentiniń «Ózbekstan-2030» strategiyası haqqındaǵı Pármanı qabıl etildi. Usı kúni Prezidentimizdiń jáne bir áhmiyetli hújjeti, «Ózbekstan-2030» strateriyasın 2023-jılı sapalı hám óz waqıtında ámelge asırıw ilajları haqqındaǵı Qararı qabıl etildi. Qararda «Ózbekstan-2030» strategiyasınıń bes tiykarǵı baǵdarı boyınsha belgilengen maqsetlerdi 2023-jılda ámelge asırıw hám 2024-jıl ushın tayarlıq kóriw máseleleri orın alǵan. Bunda bes baǵdar boyınsha ámeliy ilajlar rejesi tarmaqlar kesiminde 320 maqsetli kórsetkishler belgilengen hám 105 normativ huqıqıy hújjetlerdiń joybarları islep shıǵılatuǵınlıǵı belgilengen. «Ózbekstan-2030» strategiyasında nızam ústinligin támiyinlew menen birge, sud-huqıq tarawında da bir qatar maqsetler belgilendi. Atap aytqanda, birden-bir elektron reestr jaratıw arqalı jınayat isin qozǵatıwdan baslap is boyınsha húkim shıǵarılaman degenge shekem bolǵan processlerdi individual nomer hám QR kod arqalı baqlap barıw imkaniyatı engiziledi, dálillerdi toplaw hám bekkemlew jumısları zamanagóy texnologiyalar hám sońǵı ilimiy jetiskenliklerdi engiziw arqalı tolıq sanlastırıladı. Sonday-aq, 100 payız jınayat isleri hám materiallardıń elektron formadaǵı nusqasın júrgiziw hám usı isler boyınsha elektron hújjet almasıwın támiyinlew belgilengen. Strategiyanıń jáne bir maqsetlerinen biri – korrupciyalıq faktorlardı saplastırıw sistemasınıń nátiyjeliligin asırıwdan ibarat. «Transparency International» xalıqaralıq shólkemi tárepinen járiyalanǵan Korrupciyanı qabıl qılıw indeksinde keminde 50 tekshe kóteriliwge erisiw, mámleketlik satıp alıwlar haqqındaǵı nızamshılıq hújjetleri talapların buzıw jaǵdayların eki esege kemeytiriw, bul tarawda qarjılardı talan-taraj etiw, tovar hám xızmetlerdiń bahası bazar bahasınan asıp ketiwiniń aldın alıw boyınsha jámiyetshilik qadaǵalawdı tolıq engiziw tiykarǵı kórsetkishler sıpatında belgilendi. Prezidentimizdiń «Ózbekstan-2030» strategiyasın 2023-jılı sapalı hám óz waqıtında ámelge asırıw ilájları haqqındaǵı Qararında jınayat isleri boyınsha sudqa shekem is júritiw dáwirinde processual qararlarǵa sankciya beriw máselesin óz aldına sudyalar (tergew sudyaları institutı engiziledi) tárepinen kórip shıǵıw tártibi haqqında Prezident Pármanı, usı processlerde shaxstıń huqıq hám erkinliklerin qorǵawdıń kepilliklerin kúsheytiw, qıynawlardıń aldın alıw boyınsha preventiv mexanizmlerdi jetilistiriwge baylanıslı, málimlemeslestiriw qaǵıydaların buzǵanlıq ushın juwapkershilikti kúsheytiw boyınsha nızam joybarların tayarlaw kórsetilgen. Strategiyada kórsetilgen hár bir maqset hám kórsetkishler puqaralardıń konstituciya hám nızamlarda kórsetilgen huqıq hám erkinliklerin sózsiz támiyinlewge xızmet etedi. Nókis rayonlar aralıq hákimshilik sudınıń sudya járdemshisi A.Kenesbaeva