Búgin, Nókis rayonındaǵı Ruwxıylıq hám aǵartıwshılıq sarayında rayon hákimligi tárepinen «Úsh áwlad ushırasıwı» ilajı shólkemlestirildi. Ilajǵa Qaraqalpaqstan Respublikası Ishki isler ministri másláhátshisi, polkovnik O.Turdaqov, napaqadaǵı polkovnik A.Temirxanov, Veteranlar keńesi baslıǵı F.Sankibaev, Ishki isler ministrligi ruwxıy-aǵartıwshılıq hám kadrlar menen támiyinlew xızmeti baslıǵınıń orınbasarı, podpolkovnik A. Madjidov hám jaslar mirát etildi.
Ushırasıwdı rayon hákimi Z.Zaytov ashıp berip, elimizdiń rawajlanıwına múnásip úlesin qosıp kiyatırǵan bir topar veteranlar hám taraw wákilleriniń úlgili islerin ayrıqsha tilge aldı. Sonıń menen birge nuranıylar sózge shıǵıp, úlken ómiri hám miynet iskerligi dawamında toplaǵan bay tájiriybesi, jaslıq dáwirindegi ózine say qıyınshılıqlar, házirgi waqıtta nuranıylarǵa kórsetilip atırǵan húrmet-izzet haqqında ózleriniń kewilden shıqqan pikirlerin bildirdi.
Búgingi erkin hám abat jámiyetimiz,párawan turmısımız, bulardıń bári mámleketimiz basshısı tárepinen ámelge asırılıp atırǵan ózgeris hám jańalanıwlar nátiyjesi ekenligi atap ótildi. Ilaj dawamında rayonlıq Mádeniyat bólimi xızmetkerleri tárepinen koncert baǵdarlaması usınıldı. Álbette, bunday ilajlar jaslarımızdıń hár tárepleme jetik insan bolıp jetilisiwine, miynet nuranıylarınıń turmıs mektebi menen jaqınnan tanıs bolıwına xızmet etedi.
